زهور الروح _ السيد الشهاوى
زهور الروح
غنوه الشاعر السيد الشهاوى
ماتقولشي إنك مش فاهمني
وتحيرني كمان وكمان
نار قربك ولا جنه في بعدك
وليالي الشوق والحرمان
انا اصلي قريت جوا عيونك
احلام واماني وامان
لازم تعرف إني باحبك
من قبل ما اقابلك بزمان
*****
كل اللي يشوفك بيقولك
هما عيونك ليه حلوين
فيهم فرحه وفيهم ضحكه وفيهم وعد وشوق وحنين
ماشافوش الدمعه في عيونك ماشافوش فيهم غدر سنين
ولا عرفوا إيه معني الغربه
لما نفارق ناس غاليين
ناس كانوا اقرب لك من روحك أقرب من رمشك للعين
آنا بس إللي قريت في عيونك نفس حكايتي شفتها فيك آهات وليل وشجن وحنين
*****
شفت شفايفك لما بتضحك
ورا ضحكتها قلب حزين
حتي كلامك فيه تنهيده
وفيه شكوي ودموع وانين
وقابلنا كتير ناس ظلمونا
سرقوا احلامنا وخدعونا
ونسيونا ومبقوش فاكرين
وكانت دي حكايتي وحكايتك
وحاولنا ننسي ومش عارفين
*****
وفرحت بيك لما قابلتك
فرحت بيك
ومن فرحتي ماعرفشي ليه يومها بكيت
يمكن علشان عمري اللي ضاع مني
وانا بادور عليك
قصص كتير أنا عشتها وكتبتها
وكل كلمه وكل غنوه وكل واحدة عرفتها
كان فيها حاجه واخداني ليك
وحلمت ياما ييجي الربيع يناديك
واشوف الورد في خدودك وطيور النرجس تلاغيك
واشوف كل الزهور غيرانه
من سحرك وعطر المسك والعنبر
ذي النسيم حواليك
ياخدنا الشوق يطير ببنا
يمرجحنا. ....يطوحنا
واشوفك الفرحه جوا عينيك
السيد الشهاوى
اضف تعليقاً عبر:
الابتسامات