ظلال تبحث عن ملامحها .. _ نشأت البسيوني

 

ظلال تبحث عن ملامحها في شوارع بلا ذاكرة

بقلم/نشأت البسيوني

في المدن التي نمر بها دون أن نترك خلفنا غير أثر خفيف يذوب مع أول نسمة هواء تتكدس حكايات لا تجد من يرتبها أو من يفتح لها نافذة لتتنفس منها هناك وجوه تعبر الأرصفة بملامح مرهقة لكنها تخفي جواها شرارة صغيرة تكسر العتمة حتى لو ما حدّش شافها وفي قلب الزحام تخرج أرواح معلقة بين ما كانت تتمنى أن تكونه وما اضطرت إنها تبقى عليه أرواح ما زالت بتحاول تثبت لنفسها

إنها لسه قادرة توقف على رجليها حتى لو اتجرحت عشر مرات وكل جرح منهم كان أعمق من اللي قبله والإنسان يا صاحبي مش مجرد خطوات ماشية على الأرض ولا مجرد صوت بيعدي ولا ذكرى بتتنسى الإنسان هو الصراع اللي محدش بيسمعه والانكسار اللي محدش بيشوفه واللحظة اللي بيقرر فيها يكمل رغم إن كل شيء جواه بيطلب منه يوقف هو السؤال اللي بيهرب منه طول الوقت

لو الزمن اداني فرصة تانية هل كنت هغير طريق ولا كنت هلاقيني راجع للمكان اللي وجعني من الأول وفي الليل لما تسكت الأصوات وتهدى الشوارع من دوشة النهار تظهر الحقيقة قدام كل واحد زينا الحقيقة اللي بنخاف نقولها ونخاف نعترف إنها جزء منا إن الجري مش دايما هروب ساعات بيكون محاولة نلحق الجزء اللي ضاع منا قبل ما يضيع أكتر وإن القوة مش معناها نكسب ولا إنها نبان

ثابتين القوة الحقيقية إننا نقدر نكمل وإحنا شايلين قلوب اتشقت ومشاعر اتكسرت ورغبات اتأجلت لحد ما بقت شبه حلم قديم محدش فاكره غيرنا ووسط كل ده تفضل في جوانا رغبة غريبة رغبة إن حد يفهم من غير ما نشرح وإن حد يشوف اللي مستخبي ورا الضحك وإن حد يمد إيده من غير ما نطلب لكن الدنيا ما بتديش الهدايا دي بالساهل فنتعلم نكون إحنا السند لنفسنا وإحنا

اليد اللي تلم الشتايت اللي وقعناها وإحنا اللي نخلق لنفسنا باب نعدي منه لما الدنيا تزنق علينا وفي لحظة معينة من غير ما نلاحظ نكتشف إننا أكبر بكتير من فكرة السقوط وإننا مهما اتكسرنا نرجع نبني نفسنا من جديد وإن الظلال اللي كنا فاكرينها تايهة كانت طول الوقت بتدور علينا وإحنا فاكرينها هاربة منا لأن الإنسان مهما ضاع فيه جزء جواه عمره ما بينطفي جزء بيصر

يكمل بيصر يحلم بيصر يفتش عن نور يثبت له إنه ما عاشش عبث ولا تعب هدر وهكذا نمشي وكل واحد فينا شايل سيرته على كتفه بيلمها يوم ويفلتها يوم بس في الآخر يعرف إنه لسه واقف وإن الوقفة دي لوحدها بطولة محدش يقدر يقلل منها مهما كانت الدنيا تقيلة