التبني !!! _ محمود عفيفي دومه
التبني !!! (٢١١)
ليه عينيكم جت عليا!!!
كانت دي صدفة ولا طيش؟
شوفتوني راح أسد خانة
وأبقى زينة قلب نيش؟
ولا بروش لونه يبرق
وسط عروة وفـ الأفيش؟
كنت سيبتوني في حالي
كان كويس إني أعيش
راضي مرضي باللي فيا
رغم زهري كله بيش
وسط كم وحالة شبهي
ولسه ما اكتملش نبهي
وقسمتي بيضا.. ومفيش!
صدفة تبقوا في سكتي
ومن البداية السكة عوجة
تترها حزن وأنين
ريشة وسط ريح وهوجة
جيت هنا وأنا أبقى مين؟
سمكة وبتحدفني موجة
كل سمعي كام طنين
ولا صدر عني حايش
جذر فارق مية طين
وفكر حاوي شرود ورايش
كنت جاي الدنيا طازة
وميت سؤال بيقول: لماذا؟
كل واد في حضن أمه..
أما أنا!!!
أمي ساكنة في القزازة
حاجة مرسومة في خيالي
وليها أناجي ياريت لمستك
حبل سري في دنيا عتمة
كان واصلني من بلاستيك
والحقيقي اللي في حياتي
ماطة تتغير وأستك!
كنتوا ليه واخدني لعبة؟
بس تبكي وكانت بتضحك
بس كنت لعبة صعبة
كنت سلاوة وعروستك
ويوم ما جيتوا تنقوا واد
من وسط حرمان الولاد
كنت لسه لحمة حمرا
صدر أمه راح وجلى
وليّ فضل للبعاد..
والقدر ضحك وحظي
إنه في الإخراج أجاد
أنا أكون في وسط عيلة
أب.. أم.. ربوا فيا
شمس ضلة وألف ليلة
وكانت عيوني مكتفية
كنت أقول "أمي" تردي
كنت أنده "يابا" تشدي
على يدي.. وتقولي "عيني"
والحياة كبرت وبينكم
وطباعكم كسبها جيني
شد عودي كبرت بينكم
وكنتوا ليا آيات في ديني
كنت منكم.. كنت بينكم
كنت حاسس بوجودي
بحبكم.. أبويا وأمي
عطفكم.. أبويا وأمي
كل حاجة فيكم ليا
كنت تندهوني "مودي"
كنت أقول عمري فداكم
لما خضر بس عودي
كنت واهب روحي دية
بس كان مكتوب لي قصة
نونو بتفتح ورودي
لا ليا ناقة ولا حتى يد
عود ونبت قلب صحرا
لا اتسقى ولا شاف لود
ولما بيتكم دق طبلة
كنت حاسس همس حاد
وربنا بالرزق أوهب
خيره عم عليكم جاد
كنت أنا قبله "محمد"
وكنت أول الولاد
جه محمد أولى مني
أما أنا نصيبي البعاد
دمعي غرق السؤال..
ليه بجد؟
ودي حقيقة ولا خيال؟
واللي كان محاوطني زيف!
كان شتايا أصله صيف!
يعني أنا في الأصل ضيف؟
وكان دفايا دهان وبويا؟
يعني تاني مقولش أمي؟
وأنت يابا مش أبويا؟
ضهري صابه ألف سيف
بعد ما داق لساني حرفك
كان ده حلم ومن التمني
كنت حاسس إني عارفك
كنت باسمك بغني
وربي كان على قولي شاهد
تاني تتعاد المشاهد
والمخرج يتخلى عني
في دنيتي أعافر وأناهِد
وتاني من أبيض.. لبني!
مش مسامح!!!
سهو توهت في الملامح
مش مسامح!.. وده لأني
حلم كان حاضن تمني
مش مسامح!!!
آه بقولها وغصب عني
بقلمي/محمود عفيفي دومه
اضف تعليقاً عبر:
الابتسامات