حين تشعر أن العالم لا ينتظرك _ نشأت البسيوني

 حين تشعر أن العالم لا ينتظرك

بقلم/نشأت البسيوني 

تجي عليك لحظة تلاقي نفسك واقف في نص الطريق تحس إنك مهما حاولت تركض الدنيا ماشية أسرع وإن الأحداث أكبر من قدرتك وإن الناس بتتغير أسرع مما تتحمل وإن اللي كان ثابت جواك بقى مهزوز وإنك ماعدتش فاهم هل انت متأخر ولا العالم هو اللي مستعجل زيادة تحس إنك غرقان في تفاصيل مش بتخلص وإنك بتحارب في كل اتجاه من غير ما حد ياخد باله من المعركة 

اللي انت عايشها جواك تحس إنك بتبتسم علشان تعدي يومك مش علشان مبسوط وإنك بترسم ثبات على شكلك علشان ماحدش يشوف الارتباك اللي جواك وتبدأ تسأل نفسك أسئلة عمرك ما توقعت تسألها هل أنا في مكاني الصح ولا ضيعت وقتي هل أنا كنت طيب زيادة ولا ساذج هل الناس اللي وثقت فيهم كانوا يستحقوا ولا لا هل الطريق اللي اخترته فعلا طريقي ولا كنت ماشي وخلاص

ومرة بعد مرة تكتشف إن الحياة ما بتقفش على حد وإن الناس بتكمل مهما حصل وإن الغياب ما يهزش الدنيا زي ما كنت متخيل وإن وجودك الحقيقي ما يقاسش بعدد اللي بيسأل عليك لكن بقيمة الروح اللي لسه بتقوم رغم كل السقوط وتلاقي نفسك بتتغير ببطء من غير ما تحس تبطل تمسك في اللي بيبعد وتبطل ترجع للوراء وتبطل تشرح وتبطل تستنى من حد يقول لك إنك ما غلطتش 

وتعرف إن اللي بيمشي من حياتك كان لازم يمشي واللي يفضل هو اللي يستحق يبقى وتبدأ تبني نفسك من جديد على هدوء مش على خوف على وعي مش على اندفاع على فهم مش على لهفة وتدرك إن التأخر مش عيب وإن التباطؤ مش هزيمة وإن اللي يتأخر شوية ممكن يوصل أبعد من اللي جري من غير ما يفهم هو رايح فين

 كل شعور صعب هتعرف إن العالم فعلا ما بينتظرش حد لكن ربنا 

عمره ما ساب حد لوحده وإن كل مرة حسيت فيها إنك تايه كانت خطوة بتقربك من نفسك وإن الطريق اللي انت ماشي فيه يمكن بطيء لكنه حقيقي