توازن داخلي _ نشأت البسيوني

توازن داخلي

بقلم/نشأت البسيوني 

في لحظة ما تكتشف إن الصراع الحقيقي مش بينك وبين العالم لكنه جواك بين اللي عايزه واللي مفروض تعمله بين صوت قلبك وصوت خوفك بين رغبتك في الراحة وخوفك من الخسارة وبين اندفاعك واحتياجك للهدوء وتبدأ تحس إنك طول الوقت مشدود ناحية اتجاهين يا إما بتدي كل حاجة لحد ما تفرغ يا إما بتبعد لحد ما تحس بالوحدة يا إما بتتكلم باندفاع يا إما بتسكت لحد ما تتعب 

من جواك وكأنك مش قادر توصل لنقطة وسط ترضيك وتسأل نفسك هو ليه صعب أوصل للاتزان ده ليه دايما محتاج أميل لطرف ليه مش عارف أعيش بهدوء من غير ما أبالغ في ردود فعلي أو في إحساسي أو في قراراتي ومع التفكير تبدأ تفهم إنك اتعودت على التطرف اتعودت تعيش يا بكل طاقتك يا من غير طاقة يا بكل قلبك يا من غير إحساس وإنك ما اتعلمتش إزاي تمشي في النص إزاي 

تاخد وتدي من غير ما تخسر نفسك وتقرر بهدوء إنك هتجرب تعيش بشكل مختلف تبدأ تحط حدود من غير قسوة وتدي من غير ما تستنزف وتحب من غير ما تذوب وتبعد من غير ما تقسى وتتعامل مع نفسك برحمة مش بضغط وتلاقي مع الوقت إنك بدأت تهدى إنك بقيت تفهم مشاعرك قبل ما تتحكم فيك وإنك بقيت تعرف تقول لأ من غير ذنب وتقول آه من غير خوف وإنك بقيت 

تشوف الأمور بشكل أوسع وأهدى وتدرك إن التوازن مش معناه إنك تبقى كامل لكنه معناه إنك تبقى واعي واعي بإمكانياتك وحدودك وطاقتك واحتياجك وإنك ما تضغطش على نفسك علشان توصل لصورة مثالية مش حقيقية تفهم إن التوازن الداخلي هو المفتاح لكل راحة وإنك لما توصل له مش هتحتاج تهرب من حاجة ولا تتمسك بحاجة لأنك ببساطة هتبقى في مكان مناسب ليك من غير صراع